WARA-WARA (PENGUMUMAN)
Wara-wara yaiku pratelan kang nerangake samubarang kang penting, isine cekak
aos, cetha gamblang tur gampang dimangerteni
Perangane Wara-wara
1. Irah-irahan wara-wara
2. Adangiyah / adawiyah (Unggah-ungguhe basa kang ngirim wara-wara)
3. Bebuka/pambuka/purwaka basa (Ukara Pambuka wara-wara)
4. Surasa basa/isi (isining wara-wara)
5. Wasana basa/penutup (perangan/ukara kang kanggo mungkasi atur)
6. Panggenan lan titi mangsa (tempat lan tanggal)
7. Paprenah (sesambungane wong kang ngirim karo wong kang dikirimi
wara-wara)
8. Tapak asma (tandha tangan)
9. Nama terang (jeneng kang nggawe wara-wara)
Syarate wara-wara
1. Basa kang digunakake cetha, gamblang lan gampil dimangerteni
2. Isine cekak aos
3. Katujokake marang kelompok/bebrayan tartamtu
4. Basane komunikatif (ora ngaya wara cukup saprelune wae lan nganggo
tetembungan kang prasaja supaya bisa ditampa dening sapa wae
kang krungu lan maca).
5. Perangane jangkep (wara-wara mau bisa mangsuli pitakon 5W+1H)
Wujuding (Bentuk) wara-wara
1. Lisan. Asring dipungiyaraken lumantar radio,lan siaran.
Ex. Siaran lelayu, wara-wara lumantar radio, lsp.
2. Tulisan. Lumrah wonten ing ariwarti (koran), kalawarti (majalah) lan papan
pengumuman.
Ex. Lowongan kerja, lelayu serat, wara-wara ing sekolah, pamlet, spanduk,
lsp.
Bedane wara-wara karo pawarta
WARA-WARA kuwi ngajak sami nyengkuyung punapa ingkang dipunwartakaken.
Sipatipun persuatif (mengajak)
PAWARTA kuwi mung ngabaraken pawarta. Sipatipun informative (memberi
informasi)
Babagan kang wigati ana ing wara-wara
• Sapa sing nggawe wara-wara kudu cetha.
• Kanggo sapa wara-wara kuwi katujokake kudu cetha
• Isine wara-wara kudu cetha, jangkep lan bisa menehi katrangan kang
cukup manut kapreluane
TULADHA WARA-WARA SERATAN
Tuladha I (seratan)
(1) WARA-WARA
(2) Para kanca kang daktresnani,
(3) Kanggo mahargya pengetan dina kamardikan RI.
(4) OSIS bakal nganakake lomba Maca Geguritan. Lomba bakal dianakake ing
Dina : Setu
Tanggal : 9 Agustus 2011
Papan : Aula
Tabuh : 14.00 WIB
(5) Kabeh kelas kudu ngirimake wakile, pendhaftarane dibukak wiwit saiki,
bisa dhaftar marang Bayu Pramono kelas X. Maturnuwun.
(6) Semarang, 28 juli 2011
(7) Ketua OSIS
(8)
(9) SEPTIANI
LELAYU
Innalillahi wainna illaihi roji’un
Assalamuallaikum wr, wb
Dhumateng para warga desa rejosari ingkang minulya
Ngaturi uninga bilih kala dinten Senin Pon surya kaping 13 Januari 2002, wanci
tabuh 04.15 WIB sampun katimbalan sowan wonten ngarsanipun Allah SWT,
BAPAK MARTONO
Jalaran nandhang gerah sepuh. Almarhum kaparingan yuswa 83 taun. Dene
jenazah badhe kasarekaken wonten pasareyan Bergota Semarang, dinten Selasa
Wage surya kaping 14 Januari 2002 tabuh 11.00 WIB.
Bidal saking griya Jl. Merpati 56 Semarang. Mbok bilih nalika sugengipun
Almarhum hanggadhahi kalepatan dhateng panjenengan sedaya, kulawarga
nyuwunaken pangapunten.
Wassalamuallaikum wr, wb.
Ingkang nandhang sungkawa
kulawarga Budiyanto lan kulawarga Sudiyanto
TULADHA II (lisan)
Wara-wara diaturake saka mobil promosi keliling.
Ngaturi wuninga dhateng warga Sumber Agung lan sakitaripun bilih mangkeh
Dalu kasuwun rawuh dhateng lapangan desa Sumber Agung ingkang saprelu
mirsani Pameran Pembangunan 2008. panjenengan saged mirsani asiling
budidaya alat-alat produksi tepat guna kadosta:
• Mesin pengrontok pantun
• Mesin parutan klapa
• Mesin rajangan tela/pohung
Ingkang sedaya kalawau kasade kanthi regi ingkang mirah saha barang-barang
ipun nggadhahi kwalitas inggil.
Panjenengan boten prelu tidha-tidha malih, sumangga enggal-enggal tumuju
dhateng lapangan…
Panjenengan uga badhe dipunaturi pasugatan dhagelan Sandhirana Sandhirene,
sumangga ampun nganti kesupen…
LELAYU
Assalamuallaikum wr,wb.
Innalillahi wainna illaihi roji’un 3x
Ngaturi uninga bilih dinten menika (Selasa Wage surya kaping 30 Maret 2002) MBAH MARTONO
sampun kapundhut tillah rohmatillah. Mbok bilih para sedherek/saudhara hanggadhahi wekdal kula aturi takziah wonten dalemipun MBAH NASI. RT05 RW 01 dusun Gebog Kembang. Dene jenazahipun samangke kasarekaken tabuh 11.00 siyang ing pasareyan umum desa Kembang. Matur nuwun.
Wassalamuallaikum wr, wb.
PAMLET
WARA-WARA
KULA ATURI NGRAWUHI
Pagelaran wayang kulit kolosal 3 dhalang kondhang, mapan wonten ing gedung
Wayang Orang Sri Wedari Solo.
Kangge mahargya pengetan HARI IBU INTERNASIONAL INGKANG KAPING 8
tanggal 21 Februari 2008
Pemrentah Kota Surakarta makarya sesarengan kaliyan PEPADI Jawa Tengah, badhe ngawontenaken pagelaran ringgit wacucal sedalu natas kanthi dhalang cacah 3.
Enthus Susmana-Warsena Slank-Ki Mantep Sudarsana, kanthi lampahan Ngruwat Bumi Nuswantara Ing dinten Kemis Kliwon, Surya Kaping 21 Februari 2008
Dipunsengkuyung dening wirapradangga, saha swarawati ingkang sampun kawentar,
Sunyahni-Waljinah-Nurhana
Boten katalompen ugi dipunsengkuyung grup campursari Sangga Buana saha bintang tamu saking Ibukota : Kirun Cs.
Kajawi menika ugi badhe dipunwonteni kepyakan:
-Java day, saben dinten kemis wajib ngginakaken basa Jawi ing saben kantor
-Namaning kantor Pamrentahan sinerat ing seratan Jawi
-Ageman Lurik pinangka identitas Surakarta
Sugeng mirsani ...................
