CANDRANING TEMANTEN PANGGIH
Swaraning pradangga munya hangrangin, kadi asung pepuji
mring pinanganten kekalih murih kang kaesthi dadi kang sinedya teka. Saya caket
anggennya sami lumaksana penganten kekalihipun sami pagut tingal. Tempuking
pandulu catur netra mahanani rasa geler sanubari, manunggaling rasa tresna lan
asih sinurung kasmaran ing panggalih, marmane datan bisa cinitra ing ukara.
Panganten kakung putri tumunten sami balang-balangan gantal, ingkang dumadi
saking roning sedhah temu rose kalinting tinangsulan lawe wenang, gantal kang
kabalangaken panganten putri winastan gondhang kasih, wondene gantal kang
kabalangaken panganten kakung winasta gondhang tutur.
Prapteng papaning panggih wus kacawicaken loro wening munggwing bokor
sinebaran puspa triwarna, sekar mawar, sekar mlathi, miwah sekar kanthil,
mujudaken satunggaling sasmita menggahing panganten sekaliyan ingkang sampun
pinasthi jinudho.
Awit saking karsaning gusti, lamun winawar ing tembung manis
saking kedaling kanthi mahanani kumanthil-kanthil beblesing ati.
ATURIPUN PAMBIWARA BILIH UPACARA PANGGIH SAMPUN RAMPUN
KALAJENGAKEN UPACARA KROBONGAN.
Para rawuh kakung putri ingkang satuhu luhuring budi.
Saparipurnaning upacara panggih punika badhe kalajengaken upacara krobongan,
antawisipun timbangan, tandur, kacar-kucur, ngunjuk toya wening dalah dhahar
kembul dulang-dulangan.
Katur dhumateng ibu endhang kusumaningrum kersa
hamratitisaken. Wekdal kasumanggakaken. Nuwun.
ATURIPUN PAMBIWARA BILIH BESAN SAMPUN RAWUH. TUMENTEN
KALAJENGAKEN UPACARA SUNGKEMAN.
Kawistara besanipun Bapak Siswanta inggih panjenenganipun
Bapak Purwanta sekaliyan garwa kanthi raharja manjing sarana pawiwahan,
sasampunipun ingkang sami mangan bebesanan sami tangkep asta pratandha sampun
suka pambagya, nunten kadherekaken lenggah ing palenggahan sacelakipun
penganten, ingkang saperlu nampi atur pangabekti saking putra panganten.
Kaleksananing upacara sungkeman kula aturaken panjenenganipun ibu endhang
kusumaningrum kabyantu penjenenganipun ibu asih ingkang badhe nglolos dhuwung
panganten kakung.
Tidak ada komentar:
Posting Komentar